蘇斯黑柴 ：澳洲夠料首度封王

主導攻防戰 拒南韓偷雞
澳洲過往踢法粗枝大葉，不過喺技術流領隊普斯迪高路帶領下注入細膩元素，令球隊踢法更全面，所以即使喺過去一年來戰績一般，澳洲足總對呢位主帥依然深信不疑，終於成就今屆賽事優異表現，佢哋係今屆賽事進攻王，12個入球中除前線靈魂卡希爾佔３球外，其餘入波由9個不同球員取得，進攻點多到爆。

澳洲防線喺分組賽出現唔少甩漏，但普帥喺準決賽對阿聯酋起用雙防中，由米利根搭住隊長積甸拿克，大大減輕後防壓力，雖然分組賽曾以0比1不敵南韓，不過基於雙方當時都已提早出線，澳洲三大攻擊主力卡希爾、羅比古斯同馬菲歷基都只係喺比賽尾段至後備落場，其實嗰場波澳洲全場控制戰局，南韓只靠一次反擊贏波，今場澳洲夫添出擊南韓唔會咁好彩嘞！

澳洲係進攻王，南韓就係防守王，德國籍名帥史泰歷克將穩守突擊發揮得淋漓盡致，打咗五場比賽仍然保持零失球，不過前線主力具滋哲同李青龍因傷緣盡亞洲盃，攻力大打折扣，只能靠孫興民同李廷記打反擊，中場組織亦過分倚賴効力史雲斯嘅奇誠庸，創造性難同澳洲相提並論。

卡希爾蓄銳搏今仗
兩軍喺準決賽都憑早段取得入球擊退來自西亞嘅對手，但澳洲贏波過程更見輕鬆，箭頭卡希爾只係踢咗66分鐘就休息，蓄銳踢今場決賽。今仗預期係攻防戰，澳洲勢必主導比賽，佢哋準備咗今次賽事超過半年，唔會畀鋒力削弱嘅南韓偷到雞，上盤捧得過。