歐聯16強首回合大戰,由拿玻里主場對巴塞隆拿,呢兩支褪色勁旅近期表現都令人失望,特別係拿玻里近5場比賽僅1勝,即使有地利亦難發圍。至於巴塞受到傷兵問題困擾,加上防線弱不禁風,同樣缺乏勝算。考慮到巴塞隆拿各項賽事,近9場法定時間有8次總入球開出3球或以上,捧中位數2.5球嘅入球大比較划算。(Now 643周四凌晨4時直播) 上季意甲冠軍拿玻里,自從領軍捧盃嘅主帥史巴列堤離隊後,球隊表現急速走下坡,上年11月解僱教練魯迪加西亞,請來馬沙利回巢救亡,一樣無補於事,現時已落後意甲榜首國際米蘭27分,馬沙利亦剛被炒,增添不明朗因素。射手域陀奧森漢為尼日利亞踢非國盃期間,感染腸病毒,預料今場會繼續缺陣。 兩軍鋒線俱具質素 雖然拿玻里缺少進攻主力,但為咗晉級,一定會趁有主場之利全力爭勝,否則次回合作客將會非常難踢。幸好基奧雲尼施蒙尼、基華拉斯基利亞等鋒線球員都具質素,相信應該入到波。 另邊廂,巴塞隆拿兩位鋒線球員費倫托利斯、祖奧菲歷斯都有傷在身,實力難免受削,好消息係「羅拔佬」羅拔利雲度夫斯基狀態有改善,上場西甲梅開二度,新星耶馬亦頻頻有佳作,攻力仍然有保證。 近9戰8次開入球騷 不過,巴塞防線令人不敢恭維,近2場聯賽對護級分子CF格蘭納達、切爾達,竟然合共失4球,中堅朗奴阿拿奧祖早前出現肌肉疲勞問題,可能影響發揮,令後防雪上加霜。巴塞曾於兩年前歐霸盃作客以4比2擊敗拿玻里,加上巴塞各項賽事,近9場法定時間有8次總入球開出3球或以上,今次隨時又上演入球騷,一於捧2.5球嘅入球大。 |