蘇斯黑柴：2015重新起步 多蒙特值得期待

德甲重開，歇冬期間列強轉會交投淡靜，連富豪班霸拜仁慕尼黑都有出冇入，外借咗梳頓沙基利同小將賀積查治，冬季標王係多蒙特花費1,200萬歐元由奧地利薩爾斯堡買入斯洛文尼亞翼鋒奇雲甘普，呢隊波亦係黑柴下半季嘅銀行球隊，皆因目前排尾二簡直係黐線到不能接受，雖然要搶番下季歐聯入場券前路艱辛，但排名肯定有大把上升空間。

奇雲甘普可激活前線
奇雲甘普係技術、速度同把握能力都有分量嘅年輕攻擊手，有條件激活多蒙特前線，佢同復出嘅馬高列奧斯、米希達利恩組成嘅進攻中場線既有技術亦有速度，加上防線傷疲盡起，多蒙特確有條件喺次循環大舉反攻。多蒙特聽晚會作客聯賽榜三哥利華古遜，主隊受亞洲盃賽事影響，兩大進攻主力孫興民同羅比古斯分別要為南韓同澳洲踢亞洲盃決賽，加上剛花費球會700萬歐元由羅馬買斷嘅主力守將謝華積因傷缺陣，此消彼長下，多蒙特極有希望今年有個好開始，而且預期呢場波入波唔會少！

哈化沉到爆有排衰
下半季最睇淡嘅球隊就係哈化柏林，呢支首都球會歇冬前啱啱慘吞賀芬咸五蛋，但喺歇冬期睇唔到有任何正面訊息，喺瑞士集訓同熱身賽不但表現同成績都曳，教練盧爾侯卡同球員仲發生唔少矛盾，睇嚟佢嘅執教嘅日子已進入倒數階段。哈化既冇錢買人，歇冬後第一輪比賽，更有鮑祖漢、賓哈迪拉同施格斯等主力養傷，加上日本中場細貝萌停賽，新援箭頭沙洛文卡勞踢緊非國盃，主力中場史基布特傷勢進展亦唔理想，哈化喺歇冬前冇咗佢嘅情況下兩仗共失九球，嚟緊星期日作哋作客對歇冬期積極操練同增兵嘅雲達不來梅，相信好難轉弱為強。