蘇斯黑柴：澳洲衝殺阿聯酋

級數經驗地利俱備
亞洲盃今午續演第二場準決賽，東道主澳洲出戰阿聯酋，決定邊隊同南韓爭霸。阿聯酋係今屆賽事最令人驚喜球隊，中場10號仔奧馬鴨都拉文亦係賽事最閃亮球星，不過呢隊波頂盡都係亞洲新興勢力，能夠殺入四強已經賺咗，面對亞洲頂級球隊無論級數同經驗都輸晒，何況袋鼠兵仲有主場之利添！讓球盤澳洲讓一球，上盤係不二之選。

（now 671周二下午5時直播）

阿聯酋上仗靠互射12碼掃走日本，睇到眾將有細膩技術同組織能力，防守都好有紀律，不過能夠爆冷，好大程度係因為對手失準，日本領隊艾古爾太過固執，無視頻密賽程同35歲嘅老大哥遠藤保仁賽前話出現疲勞，連續4場波用死11個正選，加上日本板斧少欠殺手，仲有本田圭佑過於獨食同香川真司失準，即使全場取得35次射門都要飲恨。阿聯酋打低日本係有啲料，但本身表現未足以顯示佢哋已經夠卡士爭亞洲盃冠軍。

澳洲情況同日本完全唔同，呢支原本粗枝大葉球隊喺技術型教頭普斯迪高路帶領下踢法更全面，球員體質比日本更強壯，而且前線有卡希爾呢位世界級射手，又有喺歐洲搵食嘅羅比古斯同馬菲歷基輔助，喺主場球迷支持，絕對唔會好似日本咁倒灶，面對只靠奧馬鴨都拉文同穆巴奧特等個別有卡士球員支撐嘅阿聯酋，兩軍差距甚遠。澳洲尋日國慶日睇住南韓贏波，今日當然唔會失威，上盤可捧。

大盤好分頭可兼顧
今仗雙方都有主力守將停賽期滿復出，包括澳洲嘅史柏拉洛域同阿聯酋嘅華列阿巴斯，不過嚴格嚟講雙方防線都唔算穩陣，澳洲主攻壓上踢法令防線經常暴露空位畀對手打快速反擊，阿聯酋守將應付澳洲空襲亦會好吃力，今場大盤有2.1倍好分頭亦可兼顧一注。