防線不穩以攻代守 今晚英超大戰,熱刺主場迎戰紐卡素。兩隊近期同樣傷停問題嚴重,但熱刺仍堅持進攻打法,繼續全軍壓上瘋狂逼搶,入球多失球亦多,例如前仗火併曼城踢成3比3,極富娛樂性,周中對韋斯咸領先下又輸1比2,至於「喜鵲」近況亦唔係好,上仗對愛華頓輸0比3,同樣捧唔落手,既然雙方近5次交手全開3球或以上,捧2.5球入球大屬明智之選。(Now 621及611周一凌晨零時30分直播) 熱刺傷兵不少於9人,其中以占士麥迪臣同雲迪尹缺陣影響最大,導致球隊近5仗錄得1和4負劣績,但主帥普斯迪高路並未放棄主攻踢法,球隊繼續場場有「士哥」,不過由於防線不穩,近期每次領先後都保唔住優勢,最終都輸波而回。熱刺今仗有隊長孫興民受傷上陣成疑,幸好李察利臣同柏比沙亞傷愈復出,中前場足夠人腳繼續喪攻。 兩軍同樣傷兵滿營 另邊廂,紐卡素傷兵及停賽球員亦超過10人,最新傷兵有門將尼克普比,據報須養傷5個月,上仗對愛華頓開始要改用杜巴夫卡把關,「膠龍」卡利奧斯擔任後備門將,結果上場淨吞「拖肥糖」3蛋,可見後防方面好唔穩陣。 喜鵲3箭頭火力十足 不過紐記今仗火併熱刺都要頂硬上,預料球隊會以攻代守,前鋒線繼續排出阿歷山大伊沙克、米基爾阿米朗同安東尼哥頓三箭頭,對住熱刺條豆腐防線要入波唔難,相信今場會多波入,大家等睇入球騷。 |