水晶宮主場硬淨 至於英超早場方面,有力追榜首嘅利物浦作客水晶宮。水晶宮自2014年之後,從未喺主場贏過利物浦,聞到魷魚香嘅鶴臣,肯定唔會同「紅軍」硬碰,寧願屯重兵加強防守,佢哋近7次主場出擊,6次開出半場和,今場起碼會死頂半場,半場和追得過。 (Now 621及611周六晚8時30分直播) 「紅軍」周中快車以作客以2比0擊敗錫菲聯,開季至今各項賽事22戰全部有士哥,入球能力確係犀利。 利物浦作客唔敢亂攻 不過,睇番近期利物浦入波球員集中喺中後場,3箭頭穆罕默德沙拿、達雲紐尼斯同路易斯迪亞斯,近3場都冇波入,腳頭無靈。 水晶宮啱啱又輸一場,近8戰只得1勝2和5負,主帥鶴臣係「下一個被炒英超領隊」次熱,僅次於諾定咸森林領隊谷巴,但今場要對利物浦又真係頭都大埋,因為水晶宮自2014年11月後,各項賽事近9次主場對紅軍只得1和8負,今場唯一踢法只係死守。 事實上,水晶宮主場有一定防守力,對住阿仙奴同熱刺,半場仍然可以保持不失,今季7次主場6次開半場和,加上利物浦作客表現打折扣,近7場作客只得2勝,預計「紅軍」亦唔會過分進取,半場和值捧。 |