法達斯維：佛得角為出線大起贊比亞

非國盃B組尾輪兩場賽事今晚同時開波，兩戰全和嘅佛得角火併前屆盟主贊比亞，後者想出線一定要贏波先有價講，佛得角贏唔到亦有可能出局，兩軍勢必豁出去進攻，隨時合演入球騷，大盤有2.15倍咪錯過。

（周二凌晨2時開賽）

贊比亞都幾黑仔，先有草蜢中場辛卡拉首仗受傷，肯定緣盡今屆賽事，而上仗對突尼西亞先開紀錄嘅馬約卡亦告傷出，最終仲被對手連省兩粒遭反勝，依家兩戰僅得一分，若果想進身８強，今仗對佛得角必須贏波先有價講，一定擺大個頭搶攻，但睇番佢哋後防上仗末段甩漏多多，仲玩有前冇後盞衰多兩錢重。

佛得角頭兩仗都打和得兩分，今仗贏波肯定出線，但如果和波，而同組另一場剛果民主共和國擊敗突尼西亞的話，僅得三分嘅佛得角就要講Bye Bye，況且佢哋有士砵亭中場希頓拉莫斯及里爾前鋒文迪斯達加卡壓陣，絕對有本錢爭勝。既然和波對雙方都冇好處，兩軍為出線會毫無保留搶攻，入波唔會少，今仗大細中位數只係2球/2球半，梗係撐有2.15倍嘅大盤喇。

突尼西亞遇私房菜睇定食
同時間上演嘅另一B組賽事，剛果民主共和國硬撼突尼西亞，如果佛得角擊敗贊比亞嘅話，剛果民主共和國今仗和波都要出局，但陣中効力西布朗嘅隊長穆林保因傷上陣成疑，加上近五次對突尼西亞輸咗四次，今仗焗攻隨時死快啲，突尼西亞實力明顯高一籌，小讓平半值得捧場。