深陷降班漩渦嘅卡利亞里,早前搵嚟綽號「小巨人」名宿蘇拿救亡,可惜首仗領軍即吞巴勒莫5隻光蛋,吃了一記悶棍。好彩近期已見起色,上次擊敗護級對手切塞納,盡顯主場霸氣,卡利亞里最厲害就係薩丁島地頭威力,今晚主場出戰薩斯索羅,讓平半上盤值博,1.92倍大亦值得捧場。 (TVB301周日凌晨1:00直播) 意甲受重視程度不斷下降,雖然「電話門事件」後令各球會有所收斂,但球圈依然有一套潛規則存在,只係做得冇咁明目張膽而已。好似2013年底爆發嘅假球門事件,共有90場賽事被調查,當中卡利亞里佔兩場。球壇烏煙瘴氣,係意甲墮落嘅主要原因,但從博彩角度睇,只要捉到路反而更有投注價值。 火力唔曳蘇拿有計 卡利亞里自04年重返甲組後,大部分球季都不愁降班,但隨住前班主施連路(Massimo Cellino)去年夏天離開咗呢間接掌22年嘅球會,成間會即時亂晒龍。正所謂人在人情在,年僅37歲嘅新班主真連尼Tommaso Giulini根本冇人畀面,幸好佢去年底搵嚟前名宿蘇拿執教,相信以佢人脈同經驗可以幫助到卡利亞里。 薩斯索羅連續7場失波 反觀上季僅護級成功嘅薩斯索羅,目前排到中游位置絕對係超額完成兼喜出望外,呢啲細球會一無欲無求,就大踢風流波,值得留意係佢哋防守麻麻,近7場都有失波,今場面對踢法進取嘅卡利亞里,隨時大手交易。 卡利亞里(上盤,入球大) |