九叔 ：約旦爭出線焗住攻

日本陪佢癲玩「大」龍鳳
亞洲盃踢埋今日兩場D組波，分組賽就鳴金收兵，講真呢兩場收爐波都冇乜競爭性，伊拉克要出線，打爆巴勒斯坦就梗o架嘞，1.58倍「讓球主勝」係合理之選。至於日本對住唔贏就執包袱嘅約旦，焗住要陪對手癲埋一份，1.78倍入球大開出嘅機會亦比較高。

（now671台周二下午5:00直播）

其實D組呢兩場波真係冇乜意義，除非你相信約旦、巴勒斯坦兩隊Underdog可以爆冷就當別論，從呢個角度去考慮，約旦點都係餐士大啲嘅一隊，一則佢哋件前鋒艾達杜亞呢期好勇，以4球領先射手榜，另一件鋒將阿密特希耶亦有望重披戰袍，問題係和都出局嘅約旦，憑乜同「藍武士」搏命呢？艾達杜亞話靠整體戰喎，咁講真句，就死得仲直啦。

岡崎慎司腳傷紮住上
日本隊平均質素高過約旦，組織配合又係亞洲至Top，約旦用整體戰雖然係冇辦法之中嘅辦法，實質係班門弄斧，唔衰至奇。況且「藍武士」即使和波都首名晉級，中後場今野泰幸又要養傷，但係佢哋似乎冇留力嘅諗法，連左腳唔多妥嘅射手岡崎慎司都話會紮住上，顯然會放手同約旦對攻，呢啲環境博吓個入球大冇壞。

亞洲盃D組