雷法爾 ：鋒將爭入波博表現 阿積士追榜首大炒格

抖咗接近1個月歇冬假後，荷甲今晚重燃戰火，由傳統班霸阿積士主場迎戰格羅寧根。雖然阿姆斯特丹球場喺上星期發生火燭，燒毀部分看台嘅廣告板同海報，但無礙今晚上演賽事，班波為咗繼續追擊榜首嘅燕豪芬，肯定唔會留手，1.67倍「讓主」抵玩。（now670台周六凌晨3:00直播）

近18次主場贏16場
阿積士喺歇冬前走勢強勁，聯賽錄得7勝1和佳績，同「一哥」燕豪芬收窄至4分距離，新一年主場出擊梗係搵格羅寧根祭旗响頭炮啦！早前有傳佢哋打算搵般尼射手丹尼艾格斯過檔，睇怕鋒將舒奧尼、米利克肯定加多兩錢肉緊搶攻先得。講真，阿積士向來食住「格羅」，近18次主場交手贏16場外，仲有16次轟入對方至少2球，呢對喺今季聯賽主場夾埋入11粒嘅鋒線組合，想添食唔難。

格羅2件守將養傷
咪以為格羅寧根喺歇冬前頻頻搶分升上第8位就捧得過，事實上佢哋今季聯賽作客9戰輸5場，早排對住另一勁旅飛燕諾更加係冇還擊之力，狂吞4蛋而回，加上一對守將歷克碧卡、夏迪保亞未好番，防線隨時失多幾粒，想偷雞搶分好難囉。