走肖：日本牌面夠克敵

贏波即篤定出線必搏
亞洲盃D組重頭戲上演，伊拉克今日喺布里斯班對日本，形勢好危，畢竟伊拉克隊長尤尼斯已經成年冇班落，狀態勁差，之不過日本天王本田圭佑最近獲選為東瀛最英俊男士，連個勢都贏埋，有機會用超必帶挈可「夫添」嘅日本開2.05倍「讓球客勝」！

（now671台周五下午5:00直播）

爭取衞冕嘅日本，首戰以4:0搞掂巴勒斯坦，反映教頭艾古爾雖捲入西甲假波醜聞嘅消息，但對佢哋冇乜負面影響，況且亞洲盃四朝元老將遠藤保仁上仗更加先開紀錄，今場仲係佢為國家隊第150次上陣，意義重大，加埋超新星武藤嘉紀嘅傷冇咩事，配合陣中10個歐洲外流球星出擊，牌面殺晒。

本田圭佑狂練罰球
事實上，今次日本主要得內田篤人因傷退隊，同埋柿谷曜一朗落選，可夫添出擊，本田圭佑近日仲狂練罰球，聽講佢喺AC米蘭訓練嗰陣，跟過「罰球王」祖連奴比南布肯奴學嘢，希望將佢嘅超必「無回轉罰球」升呢，睇怕伊拉克守門員今場有排驚。

仲有呀，美國著名電影網站TC Candler近日選出「2014年全球百大英俊男士」，本田圭佑成為全日本最帥，排全球第24位，連兩大型男金城武同赤西仁都要借過，木村拓哉甚至冇入圍，證明本田圭佑紅得好緊要，梗係要繼續入波保住人氣啦！

伊拉克隊長狀態曳
雖然伊拉克首戰以1:0擊敗最終得10人應戰嘅約旦，但佢哋要苦戰到下半場77分鐘先入波，王牌射手尤尼斯更喺73分鐘就被換走，證明佢被阿爾阿里放棄後，成年冇班落狀態好曳，要知道伊拉克由07年稱霸亞洲盃開始，前線一直靠晒佢食胡，你話依家點搞好？

亞洲盃D組