Mic少 ：巴塞未夠喉再炒艾爾切

另一場西班牙盃十六強次回合，巴塞隆拿作客艾爾切，「地上最強」首回合贏5比0，大把本錢在手，相信教練安歷基會以副選迎戰；不過巴塞二線兵實力亦遠在艾爾切之上，佢哋為爭上位絕對唔會手軟，作客一樣有力再炒對手一鑊，直取讓球客勝。

（now 635、668及TVB 13周五清晨5時直播）

後備兵爭寵同你死過
美斯剛去瑞士出席金球獎頒獎禮戥C朗開心，心情難免受影響，安歷基肯定識做，唔會喺呢場大局已定嘅比賽打擾呢位球王。尼馬上仗西甲被踢到小腿流血亦應會抖一抖，無謂因小失大。

不過巴塞後備力量雄厚，辛度拉美利斯、蒙尼亞艾哈達迪、阿達馬查奧爾等小將都獨當一面，唔好忘記仲有「老大哥」柏度洛迪古斯孭飛，陣容一樣夠殺。

事實上，巴塞上圈首回合贏侯爾斯卡四球，次回合派副選再大炒8比1，足證呢班「板櫈球員」鬥心非常高昂。

艾爾切落後五球劣勢，唔敢奢望可以反勝，隨時已呈放棄心態，尤其是佢哋現時排聯賽尾二，深受降班危機威脅，留番啖氣踢聯賽搶分好過啦，今場再次大敗好正路。