今晚英格蘭足總盃第3圈重賽上演英超對決,由韋斯咸喺烏普頓公園球場迎戰愛華頓。兩軍近期演出都麻麻,連續幾場未贏過,但相比「錘仔幫」連場硬仗,「拖肥糖」接連喺主場贏唔到不特止,作客更係任人魚肉,相信今場難阻韋斯咸贏波晉級,捧2.23倍主勝。(now621及632台周三凌晨3:45直播) 愛華頓死火傷兵多 另邊廂,愛華頓第3圈同韋斯咸首次交鋒,雖然強陣出擊兼坐擁地利,弊在踢落佔唔到咩甜頭,若非盧卡古喺補時階段入波扳平,早已被踢出局。「拖肥糖」自去年12月開始,踢11場波淨係贏過曳爆嘅昆士柏,當中5場作客全敗兼勁失11球,伊度奧同盧卡古兩大箭頭更加顆粒無收,加埋門將侯活、迪斯甸、占士麥卡菲等主將受傷唔踢得,今場造訪「錘仔幫」相信難逃被「扑濕」命運。 |