今日繼續研究亞洲盃，可能喺好多讀者心目中，對中東各隊實力都好模糊，尤其係今日出場嘅阿聯酋同卡塔爾，兩地都有大量外籍人士居住，而且屬於富裕同較開放嘅海灣國家，但講到足球，阿聯酋比卡塔爾更勝一籌，1.92倍平手盤抵捧，等樂比同大家分析。 （now671台周日下午3:00直播） 卡塔爾領隊經驗淺
人口只得200萬人左右嘅卡塔爾，搵外援入籍其實好普遍，原因係地方細。今次出戰亞洲盃就有兩名新兵入伍，分別係剛果民主共和國出生嘅翼鋒穆罕默德鴨都拿，同埋加納出生嘅穆罕默德蒙達利，可惜兩人只屬普通貨色，相信對整體實力幫助唔大。中東國家似乎有一個共通點，就係好鍾意炒領隊，由04年開始佢哋已用過10位領隊，況且呢位新上任嘅38歲少帥比馬迪領軍未夠1年，經驗方面同阿聯酋領隊馬哈迪阿里可以話冇得比，睇番上屆亞洲盃，佢哋喺自己地頭出戰，首場分組賽都落敗而回，今仗冇主場更加惡唔出樣。 阿聯酋往績秤先
樂比支持阿聯酋嘅原因，係因為佢哋嘅主帥馬哈迪阿里，堪稱係亞洲近年最成功領隊，佢掛靴後成為電子工程師，之後重返球場執起教鞭，帶領阿聯酋先勇奪08年亞青盃冠軍，之後呢班小將再喺09年世青盃打入八強，10年亞運會奪得銀牌，繼而12年倫敦奧運，阿聯酋雖然未能於分組賽突圍，但當時亦贏盡掌聲，兼且打起咗有「爆炸頭球王」之稱嘅中場奧馬鴨都拉文，連曼城都邀請過佢試腳，今次佢將會改着10號波衫，繼續係中場指揮，加埋成班波喺主帥阿里領軍之下，默契同整體發揮的確好咗唔少，佢哋贏波更得心應手。 呢班小將如今已逐漸成長，將會成為阿聯酋黃金一代，由於阿里由細睇到佢大，所以對球員特性非常了解，士氣亦非常旺盛，尤其係08年亞青盃冠軍成員兼主將迪亞比，喺11年車禍喪生後，令到呢班黃金一代成員更加團結，阿聯酋近6次同卡塔爾交手未嘗1敗，平手盤捧得過。 樂比推介：阿聯酋（平手盤） | 
