蘇斯黑柴：C組三強鼎立搶首名 伊朗上足彈藥轟巴林

今晚兩場亞洲盃分組賽都係C組賽事，呢組四支西亞球隊閂埋門火併，目標不但係出線，因為如果只攞到小組第二名，去到八強淘汰賽極可能會遇上奪標大熱門日本，所以想喺今屆賽事有更佳前途，就要努力爭取小組首名，當中尾場伊朗面對同組最弱嘅巴林贏面高唱入雲，伊朗讓半一撐上盤。

（now 671周日下午5時直播）

呢組伊朗牌面係大熱門，但計實力同近況，阿聯酋同卡塔爾都來勢洶洶，成為三強鼎立局面，今日頭場由近兩屆海灣盃冠軍阿聯酋火併卡塔爾（now 671周日下午3時直播），兩軍近期拍住上，勢均力敵，呢場乜嘢賽果都唔意外，忍手為宜。

伊朗係今屆奪標隊伍嘅第四熱門，喺葡萄牙領隊奎羅斯帶領下，佢哋喺巴西世界盃雖然未贏過於小組出局，但熟練嘅穩守突擊戰術喺場上表現獲得甚佳評價，奎羅斯習慣用541或451陣式，中後場協防聯繫緊密，前面基本上交晒畀箭頭高查尼赫特、進攻中場索查同左路嘅迪查加三個搵食。不過呢種踢法喺國際大賽遇強隊好啱用，但返到嚟水準低一大截嘅亞洲盃，被視為熱門嘅伊朗就唔可以一味主守。正因為咁，奎羅斯決定更重用年輕翼鋒查巴克殊同中鋒阿斯蒙，務求加強數胡能力。

熟晒路巴林難偷雞
巴林喺2006同2010世界盃外圍賽都踢到附加賽階段，幾乎殺入決賽周，不過基於國內聯賽發展曳，巴林足總亦愈做愈差，近年明顯已經被阿聯酋、卡塔爾同約旦等隊伍爬晒頭。該國足總又欠缺耐性，單單去年已經換咗兩次領隊，搞到每次大賽都要從頭做起，何況佢哋出名攻力弱，自13年底至今十五場比賽，有十場冇波入，新帥伊迪年僅38歲，係亞洲盃16強中最年輕領隊，今次面對熟晒佢哋路嘅三支西亞球隊，想偷雞都難，志在攞吓經驗啦！