笛子波童：馬體會+1筍到暈

銅牆鐵壁近6鬥巴塞未輸過
今晚西甲壓軸好戲由巴塞隆拿主場鬥馬德里體育會；講星味，馬體會雖然唔及皇馬同巴塞，但講到實際戰績，馬體會近兩季對住兩大勁敵可謂格食格，尤其上季六戰巴塞竟然都能保持不敗，乘接剛於西盃擊敗皇馬餘威，今次再到魯營面對近期鬧出內訌傳聞嘅巴塞真係未驚過，2.5倍讓球客勝放心捧場。

（now 632周一凌晨4時直播）

唔計上季比賽，馬體會對上三季西甲作客魯營球場唔單只全敗，而且輸親仲係大大鑊，先後輸過0比3、0比5及1比4，但經過施蒙尼悉心調教下，上季馬體會終於成功扭轉呢個劣勢；總計上季西超盃兩回合、歐聯八強兩回合及兩循環聯賽，馬體會六鬥巴塞取得一勝五和，而且比賽過程充滿說服力，絕對唔係下風波。馬體會上周中於西班牙盃十六強首回合淨勝皇馬2比0，近三場馬德里打吡戰全部贏晒，證明佢哋依然Keep到呢種「遇強愈強」嘅特質，一旦有得受讓自然好抵玩。

馬體會最成功之處係踢法機動、波到人到，所以當對方球員稍為懶於走動，想咬入佢哋真係唔容易，所以近年被指經常喺球場行行企企嘅美斯每次對住馬體會都冇表現可以理解。仲有一點要留意，馬體會上場西盃贏皇馬只係以副選落場，常規正選包括文迪蘇傑、佐治高基、堤亞高文迪斯、基比、桑法蘭托利斯等等唔係休息就係後備上陣，可以養精蓄銳搏今仗。

傳列卡特回巢取代安歷基
巴塞上場西盃以5比0大勝艾爾切，掃走上場聯賽輸畀皇家蘇斯達嘅霉氣，可惜未能令球迷消除教練安歷基同美斯之間嘅不和疑慮，尋日甚至有傳球會有意搵當年發掘美斯出道嘅列卡特回巢執教。空穴來風並非無因，巴塞球員依家抱乜嘢心態好影響佢哋發揮，況且從上述賽績分析，巴塞就算搏盡都冇必勝把握，根本讓唔起對手。