今晚意甲前四大混戰,好戲連場!榜首祖雲達斯連番失分,畀羅馬追到只差1分,今晚祖記作客排第四嘅拿玻里,形勢危危乎,隨時連榜首位置都輸埋;至於二哥羅馬掛名主場同「三弟」拉素演首都打吡,兩隊交鋒向來擦出火花,今晚前四大亂鬥,直接影響意甲爭標形勢! 羅馬拉素大激戰 (TVB 301周日晚10時直播) 羅馬今季一直追得祖記好貼,絕對係重奪失落咗14年意甲錦標好時機。「雌狼」整體戰出色,前中後三線都識入波,3位中場拿積、尼恩高蘭、比真歷今季共攻入12球,比鋒線球員更多,就算前鋒謝雲奴、中場施度基達離隊踢非國盃,對進攻影響唔大。適逢祖記硬撼拿玻里,好可能會失分,正係羅馬奪取榜首良機,應會更進取求勝。 拉素鐵三角瘋狂數胡 祖記頹勢難讓玻 (TVB 301周一凌晨3時45分直播) 「肥賓」季尾鬆人爭籌碼 祖雲達斯今季由阿里基執教,防線唔及以往穩陣,近3場聯賽有兩場領先下被對手逼和,上仗主場對國米如非對手前鋒莫路伊卡迪獨食,可能已被絕殺,今仗仲要作客遇上實力更強嘅拿玻里,肯定難踢。事實上「北方霸主」祖記南征成績麻麻,過去9次作客拿玻里僅4和5負,即使干地領軍時嘅盛世時期作客都搞唔掂對手,更何況現時處於頹勢,讓平半寧揀下盤。 |