亨格比利 :馬賽打沉蒙彼利埃

法足盃出局翻身做好戲
今晚有場法甲獨腳戲，由蒙彼利埃主場迎擊馬賽。無可否認，馬賽喺2015年個頭係開得唔靚，羞家到喺法足盃畀隊「丁組仔」踢出局，但本土盃賽Game Over加上冇歐洲賽顧慮，照計可以集中火力應付聯賽，今仗小讓近況麻麻嘅蒙彼利埃平半要交代，捧1.84倍上盤。

（TVB302周六凌晨3:30直播）

馬賽阿休戰非國盃
馬賽啱啱喺法足盃第9圈踩蕉皮，3度領先下被丁組嘅格勒諾布爾踢出局。不過最難能可貴嘅係，主帥比爾沙冇將隻鑊卸畀班手足，反而係公開道歉，呢啲大佬咁有承擔，班球員又點會唔為你搏命吖，今晚知恥近乎勇實做番齣好戲。

雖然阿休已經離隊備戰非國盃，但另一名射手巴舒亞伊近期狀態一流，由呢位比利時國腳夥拍首席射手基格納攻堅，火力依然信得過。

蒙彼利埃「返屋企」仲輸蝕
主隊蒙彼利埃今仗可以「返屋企」，事關佢哋個莫遜球場終於搞掂晒積水問題，唔使再借用鄰近嘅欖球場，呢點對於擅打地面推進嘅馬賽反而係好消息。蒙彼利埃剛啱喺法足盃吞完巴黎聖日耳門3蛋出局，最近對住下游嘅朗斯都要失分，狀態真係好一般。加上前鋒艾特法拿、守將迪爾尼同門將祖迪倫仲養緊傷，有地利都唔似係馬賽手腳喎！