Combo King ：華倫神勇大盤愛得過

講到近排最威水球隊肯定非「蝙蝠軍團」華倫西亞莫屬，竟然令到皇家馬德里22連勝走勢斷纜。聽日清晨「蝙蝠軍團」會喺西班牙盃16強首回合主場迎戰愛斯賓奴，兩軍對賽例牌開大，阿King今場一於再追大盤！

（周四清晨5時開賽）

華倫西亞剛仗爆大冷反勝皇馬，確係叻仔，球隊士氣高到不得了，但呢場勝仗代價都幾大，翼鋒皮亞堤同首席門將迪亞高艾維斯都傷出，今場肯定缺陣。迪亞高艾維斯可以話係「蝙蝠軍團」嘅守護神，有佢在陣令球隊失球數字為西甲第二最少，僅多過巴塞嘅8球，呢位巴西門神仲要係12碼專家，連美斯同C朗都曾經係佢嘅「手下敗將」。今場冇咗呢位守護神，華倫想贏愛斯賓奴惟有以攻代守，雙方近9次交手全部開大，大盤可以放心捧場！

艾美利亞3連勝「菲」同小可
講開西班牙盃，阿King就講多場艾美利亞主場對基達菲，基達菲今場有中場拿菲達及後衞沙治奧艾斯古迪路因傷缺陣，不妨博吓3連勝嘅艾美利亞再下一城。最後推介埋士砵亭主場對法馬利卡奧呢場葡萄牙盃8強賽事，士砵亭前鋒施利文尼狀態大勇，主場出擊對乙組仔，讓球主勝值得捧場。