山度士：祖記搶W打心理戰

篤爆普多斯基係無間道
今晚意甲壓軸好戲上演國家打吡，由榜首嘅祖雲達斯主場火併國際米蘭。度士都係睇意大利波長大，雖然意甲水準每況愈下，但由於祖記同國米一向勢成水火，無論大家排名差距幾大，當喺國家打吡碰頭必定打甩髀，初到貴境嘅國米新援普多斯基未出到力之餘，傳媒仲大爆佢係「斑馬兵團」粉絲，勢必擾亂國米軍心，祖記有望於新一年旗開得勝。

（TVB 301周三凌晨4時直播）

國米從阿仙奴借來德國前鋒普多斯基，相信係意甲於冬季轉會窗重開後最振奮嘅消息，話晒佢都係世盃冠軍成員，但由於轉會手續仲未搞掂，「王子」好大機會趕唔切對祖記上演處子騷。國米同祖記仇口甚深，以往對帶有「斑馬兵團」背景來投嘅人都非常敏感，無論係教頭納比、加斯柏連尼、達杜尼，抑或祖高域、佩雷斯等球員，有乜唔對辦都被視為「無間道」嚟攪亂檔。

離間計辣慶文仙尼
好事嘅意大利傳媒即刻大起底，除咗話06年普多斯基代表拜仁於歐聯作客國米攻入一粒外，07年受訪嗰陣佢提到兩位兒時偶像，係曾効力祖記嘅施丹同迪比亞路，仲話普多斯基一直係祖記粉絲。而國米能稱霸意甲，全因「電話門事件」令祖記降班；大家唔好忘記，當時嘅國米教頭，正係上年回巢嘅現任主帥文仙尼，係人都知文仙尼出名小器，普多斯基仲未為新東家出力，就因為篇陳年訪問得罪「方丈」，自己冇運行不特止，祖記呢招「離間計」，勢必擾亂國米軍心。

況且祖雲達斯今季喺「囧叔」阿里基執教下，勝在穩打穩紮，佢又同中場指揮官派路冰釋前嫌，亦激活「野獸」泰維斯頻頻士哥，呢位阿根廷前鋒以十個入波高踞射手榜榜首，弗到漏油，加上近六次主場迎戰國米取得四勝一和一負，擺明食住「藍黑兵團」，度士認為祖記稍勝一籌，有力於2015年首仗打響頭炮。