今晚以意甲做主打,阿King亦睇中咗AC米蘭主場迎戰薩斯索羅,「紅黑兵團」近期大鬧後衞荒,少帥恩沙基被迫以攻代守,面對有意大利新進國腳前鋒施蒙尼沙薩壓陣嘅薩斯索羅,隨時合演入球騷,大盤有買趁早。 (TVB 301周二晚10時直播) AC十二月尾喺杜拜同皇馬「拍跳」贏4比2,係威係勢兼穩袋400萬歐元獎金,不過「銀河艦隊」都係玩玩吓唔好太認真;其實少帥恩沙基亦有苦自己知,嗰場波有中堅麥薩斯受傷,以往出親場都佗衰家嘅「災星」邦利拿,近期改任右閘有番起色,點知佢又拉傷左腳肌肉,迪施基利奧、阿爾拉米同阿比迪仲未好番,加上保羅艾美路同尼祖迪莊要坐波監,後防得番沙柏達華倫西亞及阿歷士洛里高可用,新仔阿柏達斯都要頂硬上,認真陰功。 鬥薩斯索羅以攻代守 至於西盃十六強首回合馬拉加主場硬撼利雲特,馬拉加中場法維奧費拉拿、後衞維列頓及沙治奧辛捷士未傷愈,利雲特則有主力守將大衞拿華路坐完波監復出,有佢鎮守防線頂得住,受讓值得一試。最後英錦標四強首回合基寧咸主場對布里斯托城,前者近期多失波,主場亦遭逢兩連敗,今次遇上英甲強手布里斯托城,就算有地利主場兼受讓都咪掂,捧番布城客勝。 |