Combo King：PSG攰爆上盤牙煙

今晚賽事唔多，阿King就睇中法國足總盃第9圈嘅全法甲對碰，由巴黎聖日耳門（PSG）作客蒙彼利埃，PSG狀態下滑之餘，早前又遠赴非洲拍跳攰爆，要讓半一有啲牙煙，寧捧以逸待勞嘅蒙彼利埃下盤。

（TVB 302周二凌晨3時45分直播）

些路迪抖夠力足響頭炮
聖日耳門近年於法甲獨大，但連奪兩季聯賽錦標後，高層希望喺歐聯有所作為，對國內賽事嘅爭勝飢渴感明顯減弱，聯賽首循環竟然和咗8場咁多，其中歇冬前6場贏得兩場咁大把，唔單止落後榜首馬賽3分，仲畀里昂過頭跌落第3。上月尾PSG拉隊去非洲摩洛哥同國米踢咗場熱身賽贏1比0，不過舟車勞頓唔攰就假。雖然拿維斯同卡雲尼未有隨隊赴非洲，但呢兩位前鋒盛傳想離隊，中場柏斯托尼亦因傷缺陣。蒙彼利埃近6仗只曾1敗，當中包括喺上年聯賽收爐日作客悶和聖日耳門，韌力十足，估唔到新年第一場又碰頭，以逸待勞下再守和對手唔奇，撐蒙彼利埃下盤。

至於西甲演搶分大戰，尾二嘅科爾多瓦主場對尾三CF格蘭納達，前者今季喺自己地頭未贏過，後者亦有主力伊度拉停賽，雙方係聯賽入波最少球隊，隨時悶戰一場，玩細盤。最後蘇超獨腳戲基爾馬諾克主場硬撼班霸些路迪，些路迪上仗因對手巴特里主場積水要改期，變相獲得休息，相反上場為基爾馬諾克射入奠勝12碼嘅奇治史尼達，慶祝嗰陣興奮到跳入觀眾席，搞到攞第2面黃牌被逐堅無謂，今仗亦要坐波監，難擋抖到夠嘅些路迪於新一年打響頭炮，直取讓球客勝。