搶盃為謝拉特圓夢
為利物浦鞠躬盡瘁咗16年嘅謝拉特終於都要走嘞，不論係球迷定紅軍球員，都肯定係非常感慨。呢位「神奇隊長」日前講明希望喺臨走前贏得獎盃，用冠軍嚟同紅軍及球迷say goodbye，一班隊友當然收到晒，周二凌晨英足盃第3圈雖然只係作客英乙嘅AFC溫布頓，都會為咗佢哋尊敬嘅隊長而搏到盡，全力爭個足總盃冠軍返嚟，今場讓球主客和紅軍要「-2」都照捧！ （now 621、633及660周二凌晨3時55分直播） 踏入2015年，壞消息接踵而至，「時光這個壞人，偏卻冷酷如許，離場慢些也不許」謝拉特不敵歲月，今季體力急速下降成為防守毒瘤，搞到英雄變負累，最終佢接受現實決定季尾離開。謝拉特嘅離開難免會令紅軍球員難以接受，但同時亦會激發起佢哋嘅鬥心，喺下半季團結一致、拼盡全力為「神奇隊長」而戰，今場賽前副隊長佐敦軒達臣就叫隊友出盡全力贏個足總盃返嚟，等5月尾就踏入35歲嘅謝拉特收到一份最佳生日禮物！ 主力擔綱 巴神掛帥
利物浦領隊羅渣士今場好可能會收起剛喺聯賽對李斯特城踢足90分鐘嘅謝拉特，但為免出現爆冷戰果，羅帥應會繼續派出史達寧、菲臘比古天奴、佐敦軒達臣等主力上陣，佢哋年輕有活力，有4至5日休息時間乜都夠，攻力有所保證。另外急切想證明自己嘅巴洛迪利亦有望上陣，佢雖然喺英超仲未開齋，但今場對手只係乙組仔，以「巴神」嘅質素，絕對有力數胡。近期紅軍攻力有改善，只要佢哋認真作戰，作客都可以大勝一場！ 溫布頓「大隻仔」太慢難入波
AFC溫布頓球員質素當然同紅軍差得遠，今場爆冷希望落喺大隻佬艾堅芬華，呢位32歲前鋒獲足球遊戲《FIFA 15》評為「頭號大隻仔」，強壯有成97分（滿分100分），不過艾堅芬華坦言喺遊戲入面都唔會用自己，原因係自己實在太慢。大家都知道一個犀利嘅前鋒唔係大隻就得，仲要有射術、控球、速度等能力，溫布頓要靠一個咁慢嘅球員入波，一個字，難！今場一於捧讓球客勝！ | 
