走肖 ：紐卡素 愛華頓 聖誕派大禮

英超快車繼續開，紐卡素今晚喺主場對愛華頓，最好揀1.9倍入球大。近排紐卡素硬仗連場，球員幾乎踢到抽筋，今場唔似保持到清白。另邊廂嘅愛華頓同樣唔掂，但領隊馬天尼斯講明唔會改變打法，堅持進攻好大機會開入球騷！

（now621台周一凌晨0:15直播）

紐卡素領隊柏杜當選英超11月最佳領隊後，運勢似乎回落，而且最近佢哋嘅賽程惡啃到難以置信，計埋英聯盃，先後要同車路士、阿仙奴、熱刺、新特蘭同曼聯交手，除咗爆冷砌低車仔，其餘4場全敗，後防更令人感覺處於不設防狀態。

現時紐卡素嘅比賽信心已再次跌到低點，好難旨意佢哋可以保持清白，但好消息係柏比斯施斯嘅冒感冇事，對住曼聯更射入12碼，話晒佢都係陣中首席射手，踢得嘅話絕對有條件威脅愛華頓防線，大大增加開入球大嘅把握。

兩軍同樣不設防
愛華頓最近一樣閉翳，拆禮物日甚至以0:1不敵史篤城，但領隊馬天尼斯覺得，走勢差同佢哋嘅進攻打法冇關，講明唔會做衰仔玩龜縮。仲有呀，聽講馬天尼斯已經傾掂借用曼聯嘅贊奴沙，進攻至上似乎唔係得把口講，信佢就追入球大啦！