法達斯維：廠長有令 盡數昆士柏

壓軸尾場，阿仙奴主場出戰昆士柏流浪(QPR)，兵工廠「拆禮物日」成績一向唔錯，上仗臨尾畀紅軍逼和跌番兩分，激到主帥雲格紮紮跳，撞正作客弱過藥煲嘅QPR，仲唔火力全開搶得就搶咩？斯維力撐讓球主勝。

(now 621周六凌晨1時30分直播)

上仗利物浦成場圍住阿仙奴嚟砌，後者最終全身而退算執番身彩，不過話說回頭，佢哋只要捱多兩分鐘就可以擸晒3分，點知又老毛病發作輸死球被逼和，真係唔嬲就假，主帥雲格尤其耿耿於懷，賽前已經落「柯打」，必須趁聖誕快車期搶分提升排名。翻查紀錄，原來阿仙奴於「拆禮物日」相當醒神，過往22次Boxing Day出擊，共錄得15勝6和1負，難怪「教授」信心爆棚啦！

QPR今季作客全敗
對手昆士柏流浪作為護級分子，領隊夏利列納嘅宗旨係「主場谷，作客縮」，喺自己地頭一定要有分落袋，甚至不惜喺之前嘅作客比賽留力，呢種揀波踢嘅特點，令QPR至今所得嘅32分，全部來自主場，作客8場輸晒，係名副其實嘅「作客蟲」。最重要係QPR兩日後要返主場惡戰護級勁敵水晶宮，呢場「6分波」非常關鍵，既然今仗對阿仙奴搶分機會渺茫，倒不如留番啲力砌水晶宮好過喇，條數咁簡單，「老江湖」夏利叔點會唔識計，故不妨直取阿仙奴讓球主勝。