李榮基：羅帥重量不重質代價沉重

英超正式進入瘋狂嘅聖誕新年快車檔期，由今日起至出年1月3、4號足總盃第3圈比賽，兩星期踢足5場波，球員、領隊固然辛苦，連球迷都要考驗耐力，行街購物、開聖誕派對之餘，仲要隔晚睇波，假期充實到爆。

細孖 肥賓準備接棒
柏杜、尹戈爾同羅渣士，可以話係季初壓力最大嘅3位領隊，但前兩者總算守得雲開，柏杜由被炒邊緣到成為11月份英超最佳領隊；尹戈爾由季初4場不勝、防線無兵可用，到依家重回正軌，「魔躉」真係飲得杯落。相反，羅渣士由季初畀人插到家陣，利物浦仍然毫無起色，羅帥近期搵門將米洛列特開刀，但後備嘅巴利鍾斯亦唔見得穩陣。冇計，羅帥季前買人重量不重質，以為人多可增強板櫈深度應付歐聯，將重注押喺巴洛迪利、列基林拔同洛夫雲身上，投資策略錯晒。利物浦要爭前4，1月買人事在必行，不過羅渣士個帥位可唔可以坐到1月，根本都已經係一個疑問，遠水難救近火，睇嚟「細孖」法蘭迪保亞同賓尼迪斯，都已經準備好隨時接棒。

比起「紅軍」，阿仙奴條防線都係五十步笑百步。好在論鋒力，「兵工廠」就勁得多喇。阿歷斯山齊士嘅勤奮投入程度及把握能力，實在令巴洛迪利等利記中前場球員汗顏。阿仙奴經歷兩場大勝及歐聯抽到好籤，對士氣有一定嘅正面作用，面對咁多隱憂嘅「紅軍」，「兵工廠」嘅快速反擊，有條件搞到對手甩晒轆

（now621台周一凌晨0:00直播）