Yennie：基神歸位 紅魔霸氣發維

連贏6場勒唔住！
紅魔返嚟喇！曼聯近期一口氣連贏6場豪取18分，霸住個英超3哥位，同榜首車路士只係相差8分，只要Keep到個氣勢，堅有機會後上封王！「紅魔」今晚作客冇乜鋒力嘅阿士東維拉，2.2倍「客客」，應該唔難開出吖！

「紅魔大佬」朗尼見依家順風順水，日前向各大爭標分子下戰書，似乎對英超冠軍志在必得咁款喎！咁又唔怪得朗尼咁大口氣嘅，事關曼聯6年前嘅1月，同樣落後利物浦8分，但最終都能夠後上封王，而且「紅魔」對上一次喺2012/13球季奪標嗰陣，一樣係靠後勁奪冠，佢哋今季由季初嘅屢敗屢戰，到家陣嘅勁爆6連勝，功臣一大堆，不過講到最令人印象深刻嘅，就當然係門神迪基亞啦！

迪基亞「神救」朗尼放心喪攻
講真，曼聯份十字軍名單堅係水蛇春咁長，防線更加係重災區添，成日都要靠前面喪攻搭夠，正因為咁，先造就迪基亞作出連番「神救」，愈打愈有信心！好似上周「雙紅會」對利物浦一戰咁，「基神」嘅表現比起入波嗰幾位更出色，佢仲拎埋曼聯10月、11月份嘅最佳球員添！

當然，「紅魔」大翻身，重要功臣唔止迪基亞一個，另一位「通天老倌」卡域克，亦一樣功不可沒！呢位33歲老將近6場波踢正選，全部贏晒之餘更只係失咗3球，有佢同「基神」鎮守防線，曼聯神鋒朗尼同尹佩斯，就可以無後顧之憂喪攻啦！睇埋佢哋6戰當中有一半係由頭贏到尾，今晚再嚟多鋪怕且唔難囉。

維拉主場衰過作客
維拉實力唔係曳，不過呢班波嘅最大問題，係前鋒把握力唔夠。大家有睇佢哋對李城場波的話，都見到班射手冇個掂，兩個「士哥」都係由後衞侯頓同施亞蘭奇勒包辦。再者，呢支「非典型球隊」喺主場嘅表現仲衰過作客，地頭戰績排英超尾三，失波仲多過入波，認真離譜！今晚對住近排狀態回勇嘅曼聯，睇怕維拉都係凶多吉少咯！

Data King：紅魔旺開3球
雙方近4戰都係開角球細。

曼聯近8仗未試過半場落後。

「紅魔」連續5場總入球都係3球。

盤路解碼
維拉近19次主場鬥曼聯，得4和15負。