張健峰 ：巴塞猛火「大」炒科爾多瓦

巴塞隆拿上輪作客摸和基達菲跌咗2分，聯賽暫時落後皇家馬德里4分排第2位，要追趕「銀河艦隊」嘅榜首地位，絕對唔容許再大意失分。「地上最強」今晚主場迎戰新升班嘅科爾多瓦，淨係魯營球場嘅氣勢都夠嚇窒對手，預期巴塞今場可以大勝而歸，無論讓3球嘅2倍「讓主」抑或3.5球中位數嘅1.55倍入球大，都值得捧場！

（now632台周六晚11:00直播）

近4次主場轟入21球
巴塞上輪聯賽撞着基達菲嘅「大巴陣」，雖然控球率高達75%，但如果唔係球證喺臨完場前吹停基達菲球單刀波，睇怕巴塞連1分都未必拎到。但睇番近況，巴塞其實近10場錄得9勝1和，狀態幾好，特別主場出擊更加火力全開，近4戰主場勁轟21球，平均每場省5球有多，都咪話唔得人驚。即使尼馬足踝不適抖咗一排，尋日先至復操，不過替補嘅柏度洛迪古斯當弗，早幾日喺西班牙盃大演帽子戲法，鋒線仍有保證。

另邊廂，新升班嘅科爾多瓦攻守能力都一般，踢咗15場聯賽贏得1場咁大把，家陣排喺聯賽榜尾3位置，加上佢哋礙於實力所限，今季每逢鬥馬德里體育會、華倫西亞、西維爾等中上游球隊，後防都出現唔少漏洞，今晚造訪有美斯同蘇亞雷斯壓陣嘅巴塞，相信難逃大敗。