黃芷晴@熱刺 ：哈利多入熱刺炒起般尼

(六)20 熱刺 Vs 般尼
英超熱刺新星哈利卡尼大熟大勇，連續兩仗有「士哥」，變身「哈利多入」勁過哈利波特，協助球隊聯賽盃賽雙殺！呢位21歲前鋒近期腳風順到不得了，大大提升熱刺破門能力，今晚於主場白鹿徑球場對護級分子般尼，又係佢數胡時候，加上蘇爾達杜重拾射門鞋，炒得起防線不整嘅般尼，直取讓球主勝。

（now 622周六晚11時直播）

哈利卡尼絕對係熱刺今季最大發現，無論踢聯賽或盃賽都交到貨，英超、歐霸盃及英聯盃3項賽事加埋，共轟入11球，包括周中英聯盃又建功，大勝紐卡素4比0打入4強，該仗連「敗家仔」蘇爾達杜都有波入，證明熱刺踢得非常順，梗係唔好畀佢停，勢必乘勝追擊，希望可以力追前列球隊。

般尼防線打晒柴
般尼今季升上英超，唔夠財力增兵，打落明顯唔夠班，攻力尤其差，16場聯賽入得11球，係英超各隊入波最少一隊，今晚佢哋作客去到倫敦，難免又要捱打。好不幸般尼防線受傷兵困擾，馬菲泰萊、史堤芬禾特都打柴，更難抵擋哈利卡尼，淨輸兩球機會好大。