法達斯維：皇馬-2炸散藍十字

20連勝 強勢登場
今晚「銀河艦隊」免費有得睇！志切稱霸世界嘅上屆歐聯盟主皇馬，今晚於摩洛哥舉行嘅世界冠軍球會盃4強首度登場，火併墨西哥勁旅藍十字。「銀河艦隊」挾住20連勝氣勢如虹，C朗更腳風順到冇朋友，呢位王牌從未喺摩洛哥入過波，好勝嘅佢一定搏甩髀擴展其士哥版圖至29個國家，勢必踢走殘晒嘅藍十字躋身決賽，呢場仲有免費直播咁正，斯維買定花生捧「銀河艦隊」場，讓球主客和皇馬要「-2」都冇有怕，照捧讓球客勝。

(無綫翡翠台及TVB 13周三凌晨3時30分直播)

踢波嘅嘢好波不如好運，順起上嚟嗰陣，有時唔需要理由去解釋，好似皇馬上周西甲對艾美利亞一度形勢吃緊，下半場先有門將卡斯拿斯勇救12碼，轉過頭C朗拿拿臨整兩粒，由幾乎畀人追和變大炒四個一皮，呢啲咪有運囉。

皇馬唔經唔覺自9月中起於各項賽事連贏20仗，破咗死敵巴塞締造西甲球隊新紀錄，距離巴西球隊哥列迪巴所創下嘅連勝世界紀錄只差4場，佢哋勢頭咁好，依家絕對係遇神殺神、遇佛殺佛。皇馬成績咁好，弗到爆嘅C朗真係居功至偉，單計聯賽半季未夠，呢位射手就攻入25球，所有賽事夾埋入咗32球，場均1.39個士哥堅恐怖，最重要係佢永不滿足嘅鬥心，一定搏到盡助皇馬捧走世冠盃。

另一邊廂藍十字今非昔比，今季於墨西哥超級聯賽暫列第13，上圈若非靠完場前嘅12碼追和，都好難有命捱到加時，幾經辛苦反勝最終得番9人應戰嘅澳職球隊西悉尼流浪者，表現認真麻麻。

C朗要入勻29個國家
值得一提係，C朗過去曾喺28個國家入過波，包括葡萄牙、英格蘭甚至哈薩克，但從未喺摩洛哥入過波，仲唔趁住今次世冠盃機會，將自己嘅士哥版圖擴展至29個國家咩？況且隊友沙治奧拉莫斯刑滿復出，令防線更加穩陣，上仗搏到殘晒嘅藍十字難做攔路虎，不妨直取讓球客勝。