走肖：車路士劏定羊等放假

英聯盃8強今晚有兩場比賽上演，嚟自英冠嘅打比郡喺主場越級挑戰英超榜首嘅車路士，好難爆得出，因為「藍戰士」領隊莫連奴已講明，踢埋今場比賽，就會畀球員放假兩日陪家人，迎接聖誕新年期間嘅地獄快車賽程，「寸王」咁識做，梗要捧車仔2.17倍「讓客」啦！

（TVB301周三凌晨3:45直播）

法比加斯復出鬥打比郡
雖然「綿羊」打比郡日前喺聯賽以0:2不敵米杜士堡，隊長基奧治已經康復以正選身份領軍，但都阻止唔到佢哋輸波，加上後衞梳頓被罰紅牌，今場要坐波監認真弊，就連領隊麥卡倫都承認，爭取升班附加賽席位對佢哋好重要，睇怕打比郡球員好難集中精神响聯賽盃搏殺。

另邊廂嘅車仔，日前喺聯賽主場以2:0搞掂侯城，但現時喺榜首得3分領先優勢，好容易被曼城追上，所以領隊莫連奴對嚟緊嘅英超快車賽程好緊張，佢話陣中有外援來自唔同國家，好多都唔習慣聖誕新年冇假放，所以踢完今場會畀全隊放假兩日抖吓。

平日「寸王」為求勝利乜都冇情講，今次咁人性化嘅決定，相信可以氹掂所有車仔球員賣命。仲有呀，今場「藍戰士」有中場法比加斯坐完波監復出，佢自爆人生中只係踢過1次英聯盃決賽，07年為阿仙奴爭盃就係輸畀車路士，好恨拎番個冠軍，所以車仔今晚就算唔出最強陣容應戰都冇有怕。