主力要抖 莫帥出副選
雖然仲未到英超聖誕快車期，但英格蘭國內賽事已經開緊快車，今個禮拜就有英格蘭聯賽盃8強賽事，周三凌晨上演打比郡主場對車路士一戰，呢場波牌面上雖然強弱懸殊，但打比郡主場硬淨，加上車路士主帥莫連奴今場隨時出副選，主隊有力頂到車仔半場，一於博吓半場和！ （TVB 301周三凌晨3時45分直播） 「綿羊」打比郡上場作客不敵米杜士堡，搞到由英冠「1哥」跌落第3，不過唔好畀區區一場波誤導咗，其實打比郡屬正宗地頭蟲，連埋輸畀米堡，近4場作客輸足3場，但返到主場表現就唔同晒，近3次主場贏晒，共入11球。當然，今場對住英超「1哥」車路士，打比郡領隊麥卡倫唔會傻到做出自殺式行為，同車仔鬥攻，相信會以穩陣行先，再伺機突襲偷雞，最低限度守住個半場唔好輸先。 近7客戰6開半和
車仔領隊莫連奴今場應會派大量副選上陣，畀班主力抖吓，畢竟下周就開始聖誕快車，依家唔抖，將大大增加球員受傷嘅機會，尤其對迪亞高哥斯達呢位「容易受傷的男人」嚟講，就更需要多加保護。車仔今場派副選，冇錯實力上都一樣比打比郡超班，不過呢班後備兵好少落場夾過，默契略嫌不足，狀態亦冇班主力咁弗，好難半場就KO到打比郡，加上車仔近期作客旺開半場和，近7作客有6場係同對手半場打和，半場和值得捧場！ | 
