Combo King：史雲斯肯走肯搏 上盤打鐵趁熱

今晚個個都將焦點放喺「雙紅會」曼聯對利物浦身上，但其實另一場英超史雲斯主場對熱刺一樣有投注價值，事關熱刺今季換帥後都依然冇起色，「天鵝」主場威力勁，今場讓熱刺平半，上盤有2.09倍都幾和味，值得捧場﹗

（now 621周一凌晨零時直播）

熱刺自從冇咗「大聖爺」加里夫巴利就開始一沉不起，無論買入幾多新兵、換咗幾次帥都係「扶不起的阿斗」，但呢班級數大多只係一線尾二線頭嘅球員又自以為好勁，踢法唔夠實際，搞到攻不銳、守不穩。

相反史雲斯班球員夠晒勤力，個個都肯跑多幾步，其中今場倒戈熱刺嘅中場大將基菲爾施古臣，以及南韓中場奇誠庸都係今季英超頭十位跑動最多嘅球員之一，施古臣頭十四輪英超一共跑咗大約九十七英里，奇誠庸更跑咗九十九英里。班球員咁鬼死落力，難怪「天鵝」今季成績大躍進，球隊今季聯賽喺主場出戰八次贏咗五場，今場上盤咪錯過！

摩納哥冇hea碧捧對家
另外阿King亦睇中咗兩場法甲賽事，先係里爾主場對圖盧茲，里爾攻力曳，主力射手奧歷治近日陷入入球荒，上場歐霸對禾夫斯堡更射失12碼，畀球迷狂噓，信心跌落谷底，今場不妨捧細。另一場就係摩納哥主場硬撼榜首馬賽，摩納哥上周中歐聯擊敗辛尼特出線十六強，但前鋒貝碧托夫傷出，今場難讓狀態不俗兼抖夠嘅馬賽，捧讓球客勝。