張健峰：MSN Run順巴塞打爆基

今晚西甲基達菲主場迎戰巴塞隆拿，作客嘅巴塞近期火力全開，周中歐聯更有美斯（Messi）、蘇亞雷斯（Suarez）同尼馬（Neymar）首度齊齊入波，「MSN」撻着真係唔係人咁品，巴塞「-2」照敲2.3倍「讓球客勝」！

（now632台周六晚11:00直播）

美斯喺上輪聯賽大演帽子戲法，係佢近6場賽事入面第3次連中三元，狀態「弗」到漏。呢位阿根廷球王狀態好固然對巴塞注下強心針，不過令「張峰」睇得更開心嘅係，由美斯、蘇亞雷斯同尼馬組成嘅「MSN」組合愈踢愈有默契，周中對巴黎聖日耳門每人各省1粒，如果佢哋Keep住個勢，絕對係全球最恐怖嘅進攻組合。

巴塞唔經唔覺已8連勝，當中有5仗作客，呢5場入面又有4場攻入對手2球或以上，證明呢隊「地上最強」嘅火力唔單止喺魯營先爆發。

基達菲欺善怕惡
相反，基達菲今季只識蝦弱旅，4場聯賽勝仗嘅對手有3隊係排尾7嘅球隊，主場對住馬德里體育會同華倫西亞都係吞蛋收場。呢班波最大問題係唔識攻，首席射手卡廉尤達係就係入咗4球，不過唔知係咪中咗魔咒，返到主場就唔識入波，所以今晚就算有地利都不宜高估。