蘇斯黑柴：賀芬咸法福鬥放做大騷

德甲獨腳戲演中游對決，近績下滑中嘅賀芬咸主場迎戰升勢中嘅法蘭克福，賀芬咸主場踢法超級開放，遇上「進攻大師」舒哈夫帶領嘅法蘭克福，本來已經注定入波多。何況客軍大鬧門將荒，要由老門將希迪布蘭把關，更添今仗大騷本錢，入球大細中位數調整到3.5球都唔多，黑柴撐2.05倍大盤之餘，仲會小注博吓有11.5倍嘅總入球7+。

（有線61及201台周六凌晨3時30分直播）

賀芬咸季初經過九輪聯賽後保持不敗，但主要原因係所遇對手實力同狀態較差，近期防線問題暴露，每場低級錯誤極多，近五仗輸咗四場。不過呢班波中前場好有質素，巴西攻擊手羅拔圖法明奴同本土年輕鋒將禾蘭都非池中物，佢哋近期喺主場踢法超級開放，德國盃對對FSV法蘭克福、聯賽對科隆同漢諾威，三場波總入球加埋竟然多達20個，近兩場都開出7+，絕對入得又失得。

客軍希迪布蘭把關牙煙
法蘭克福今季請得舒哈夫出山，季初走勢唔錯，不過基於受嚴重傷兵問題困擾，十月中開始曾試過連輸四場，不過球隊中前場喺「進攻大師」調教下近期終於爆發，近三仗全勝共轟入十球，31歲攻擊手美亞更加着晒火，目前以十個入球喺射手榜領先，今晚當然有信心同賀芬咸駁火。不過法蘭克福正鬧門將荒，正選門將奇雲查普季前已經受重創，近期表現理想嘅二號門將韋爾特華特啱啱又患病要休息到歇冬，焗住要用久疏戰陣嘅希迪布蘭，呢位35歲前德國國腳今場倒戈遇舊主，但佢近年無論喺賀芬咸同史浩克嘅表現都嚴重滑坡，嚟到法蘭克福更長坐冷板，已經有超過一年未踢過正式賽事，今仗頂硬上認真牙煙。