雷法爾：慕遜加柏半場大啱數

今晚輪到歐霸盃做主角，上演最後一輪分組賽賽事，想趕搭尾班車殺入淘汰賽嘅球隊今仗肯定盡地一煲。當中A組會上演一場生死對決，由德甲慕遜加柏主場迎戰嚟自瑞士嘅蘇黎世，後者今仗唔贏唔得，弊在防線未夠班，焗攻之下肯定出事，嫌1.54倍入球大唔夠分頭，可以玩埋2.25倍半場大。

（有線63周五凌晨2:00直播）

形勢上慕遜加柏只要拎到1分就肯定晉級，雖然球隊喺聯賽近4戰得1勝有所回落，但佢哋一轉戰歐霸盃當堂醒神，暫時以2勝3和不敗佳績排喺小組榜首。計落佢哋連續13次歐戰主場都有波入，相信斷纜機會唔大。

射手拉菲爾基達奴腳風順
其實兩軍計落有一定淵源，慕遜加柏現任教練法夫爾同射手拉菲爾基達奴兩師徒，曾經齊齊喺05至07年球季幫蘇黎世連贏兩季聯賽錦標。不過今仗各為其主，佢哋肯定拋開昔日感情力保出線席位。事實上射手拉菲爾基達奴近3仗入2球腳風算順，就算中場麥斯古斯今場休戰都唔愁冇士哥。

另邊廂嘅蘇黎世想躋身32強，今仗非勝不可，以前鋒艾杜倫迪、中場耶斯尼為首嘅鋒線火力十足，已經帶挈球隊連續5場歐霸盃都有波入，確有搶分本錢。

不過要留意佢哋防線唔穩，同組至弱嘅阿波羅利馬素所入嗰4球全部多得蘇黎世防線關照。呢支瑞士球隊情迷性感足球，要佢哋突然改變打法好難囉，隨時喺歐霸盃連開6口半場大都唔出奇！

歐霸A組