渡邊年 ：信東道主麥體會響頭炮

世冠盃揭幕戰由東道主摩洛哥嘅麥靴比體育會對大洋洲冠軍奧克蘭，奧克蘭世冠經驗之豐富係參賽7隊之冠，只是實力所限，佢哋首場輸波經驗一樣豐富，對上3屆呢支新西蘭球隊都喺資格賽輸畀東道主，似旅行多過比賽，麥靴比體育會雖然亦唔係叻，但主場贏波應冇難度，信佢哋揀主W。

（無綫翡翠台及TVB13周四凌晨3時30分直播）

奧克蘭慣性陪跑

奧克蘭繼06、09、11至13年後第6次獲參賽資格，參賽次數係眾球隊之冠，不過佢哋除09年喺資格賽擊敗阿爾阿里外，其餘都係首場出戰就輸波，對上3年更因參賽球隊有7隊，輸咗資格賽即時出局，連第5都冇資格爭。奧克蘭唯一可取嘅相信係高度，隊長中堅維斯歷治身高1米93，係今屆比賽最高嘅球員，大家睇直播嘅時候可以留意吓佢嘅表現。

至於主隊麥體會係上季摩洛哥聯賽冠軍，比較特別係球隊於1922年由一班馬德里體育會球迷成立，所以主場球衣顏色就係馬體會嘅紅白間條，但佢哋今年5月又同另一支西甲球隊西維爾簽訂合作聯盟，同西甲好有淵源。至於今仗比賽城市係拉巴特，同麥體會主場只係相差3粒鐘車程，相信佢哋挾地利可輕取奧克蘭，捧主W。