科娜 ：穩奪出線Hea鬥陸軍 拜仁精打細算

喺E組鐵定首名出線嘅拜仁慕尼黑聽日凌晨會喺主場迎戰莫斯科中央陸軍，拜仁今場嘅表現影響住同組其餘三隊嘅出線機會，從陰謀論嚟講，拜仁可能會為自身利益而放水畀中央陸軍，但咁做實畀人鬧爆兼影響球會聲譽，拜仁真係敢做？既然咁難估今場波嘅戰果，不如轉玩入球大細，入球中位數調高到3.5球，拜仁近兩場聯賽只係入得一球，中央陸軍嘅攻力亦唔算強，細盤值博。

（有線63台周四凌晨3時45分直播）

莫斯科中央陸軍喺E組實力最弱，若然拜仁真係咁啱得咁蹺喺淘汰階段再遇E組對手，莫斯科中央陸軍嘅威脅點都低過曼城或者羅馬，所以拜仁隨時放水畀中央陸軍，等佢哋贏波出線。不過，從另一個角度睇，放水有欠體育精神，拜仁實會畀人插爆，堂堂德國班霸嘅聲譽受損，亦會對唔住入嚟安聯球場打氣嘅主場粉絲，所以科娜認為拜仁都唔敢貿然故意輸畀對手。

搏嚟無謂 免添傷兵
其實唔從陰謀論嘅角度去睇呢場波，已經出硬線嘅拜仁今場留力實屬正常，唔會專登輸波，但亦唔會出盡全力爭取贏波，以免增添傷兵；球隊已經有阿拉巴、查維馬天尼斯、堤亞高艾簡達拿、拿姆等幾位傷兵，拜仁實在承受唔起再有主力受傷，今場或會派副選上陣，實行以主帥哥迪奧拿主張嘅傳控打法控制戰局，穩穩陣陣踢到完場，咁樣入波又點會多呢？唔使講中央陸軍今場為全取三分實會搏命，不過呢隊波攻力唔算頂級，要入到拜仁幾球恐怕有難度，細盤可以放心捧場。