法達斯維：朗奴高文復仇尹師傅 修咸頓聖殿驅魔

「聖魔」揸弗人多年恩怨一招了！今輪英超壓軸好戲上演前列大戰，由三哥修咸頓主場硬撼老四曼聯，雙方主帥朗奴高文與尹戈爾有好深牙齒印，如今再於英超聚頭依然冇偈傾，撞正曼聯有「天使」迪馬利亞等多名傷兵續抖，朗奴高文仲唔趁機剝師傅棚牙咩？「聖人」修咸頓有得受讓，梗係撐讓球主勝喇。

（now 621周二凌晨4時直播）

90年代尾尹戈爾首度執教巴塞隆拿嗰陣，曾委任啱啱取得教練證書嘅朗奴高文做助手，呢兩位荷蘭人都算係師徒關係，由於高文係重炮手兼首奪歐冠(歐聯前身)嘅大功臣，人氣極高，尹戈爾勸佢出去闖吓，有傳係因為驚畀高文取而代之。03年高文教緊阿積士好哋哋，球隊失驚無神請尹戈爾返來出任技術總監，佢恃老賣老指指點點，仲一意孤行將同隊長雲達華治打交嘅伊巴謙莫域賣畀祖雲達斯，激發內部矛盾成績跌Watt，最終尹戈爾回巢一年多就辭職，冇耐高文亦被炒魷，一拍兩散。

今晚兩人於英超重逢，自然成為焦點，尹戈爾刻意避談彼此矛盾，強調佢對手係修咸頓而非高文，後者就話同尹老無論喺足球定生活層面都有好大分歧，當時佢哋成日鬧交，甚至差啲開拖添，睇得出佢仲滿腔怒火。

曼聯兩閘用「替工」牙煙
講番今晚場波，排第三嘅修咸頓雖有舒尼達連、杜辛泰迪治及艾達韋列特受傷，但相比曼聯有勞基梳爾、拉菲爾達施華、菲爾鍾斯、戴利白蘭特及進攻核心迪馬利亞因傷續抖，真係小巫見大巫，尤其係搵「替工」路爾斯華倫西亞同艾舒利楊格串演兩閘，都咪話唔牙煙。修咸頓坐鎮主場仲有得受讓，讓球主勝抵玩。