亨格比利 ：拉素靠高路斯掃「雷」

意大利盃第4圈今晚展開，拉素主場恭候乙組球隊華雷斯，雖然話呢隻「藍鷹」近況麻麻，主帥皮奧利仲話今仗會盡遣副選落場，但以高路斯為首嘅後備都勁過患有作客恐懼症嘅華雷斯多多聲，1.75倍「讓主」唔怕捧！

（now633及660、TVB13周二晚11:00直播）

乙組仔華雷斯作客腳軟
拉素最近3輪意甲全部失分，喺積分榜已經跌出前4，但查實佢哋上仗賽和基爾禾場波表現明顯好轉，全場近6成控球權兼且狂攻對手，失分的確係冇運。賽後翼鋒艾華路干沙利斯大發牢騷，話出咗10腳波都冇隊友頂得入喎。

可能主帥皮奧利都意識到呢個問題，賽前講明會大變陣，派遣門將伊列比利沙、中場簡拿、鋒將巴爾迪基達同高路斯等副選兵出擊。當中「Goal老師」嘅頭槌出名耍家，今晚啲傳中唔使慌冇人頂到啦！

睇小華雷斯，皆因呢班波拉雜成軍，最出名已經要數到前祖雲達斯中場巴拉斯，以及踢過阿仙奴嘅前鋒盧普利。佢哋家陣排喺意乙榜下游，今季聯賽作客8戰錄3和5負勁失16球嘅劣績，喺意乙作客都咁唔掂，去到奧林匹高睇怕都係等劏！