韋斯咸主勝冇「昆」你

韋斯咸主勝冇「昆」你
  
球迷都係善忘嘅！季初盛傳韋斯咸主帥艾拿戴斯好快會人頭落場，點知「鎚仔幫」近期先喺半場落後嘅情況下迫和侯城，跟住喺主場仲擊敗埋利物浦，就連作客奧脫福挑戰曼聯都有還擊之力，依家已經冇咩人再要求佢落台嘞；不過艾拿戴斯嘅帥位仲未完全坐穩，只要贏埋昆士柏流浪就真係冇問題嘞。（周日41，now621台周日11:15pm直播）

其實艾拿戴斯真係唔使太過擔心會畀人炒，事關仲衰過佢嘅哈利列納搞到昆流排到第18位都冇事啦！後者喺今場波仲要冇埋契仔祖爾巴頓撐住中場，嚟到「倫敦打吡戰」都好蝕底吓。反而「槌仔幫」嘅傷兵名單入面就只係得安祖卡路爾、高耶迪，同埋祖爾奧拜恩，不過前者係長期傷兵，隊友一早就已經適應咗冇佢喺度，最緊要就係安拿華倫西亞，以及迪亞法沙高出得就夠撐起前線，唯一嘅不利消息就係中堅湯堅斯被判襲擊罪唔知有冇心情落場，好在昆流嘅前線踢過6輪英超只係入過4球，完全唔識入波就算出個新仔中堅都夠贏開埋主勝有突。