捧史雲斯上盤啱「素」

捧史雲斯上盤啱「素」

英超星期六有場強弱分明比賽，主隊史雲斯聯賽雖然3場不勝，但英聯盃可大勝愛華頓其實唔簡單，加上今周有主場之利，面對連攻力都冇埋嘅紐卡素3分應該穩袋，讓球讓半、一啱晒「素」。（周六27，now622台周六10:00pm直播）

冇錯史雲斯聯賽係3場不勝，但輸俾今季嘅車仔同修咸頓其實冇嘢好講，至於作客和新特蘭場波亦唔易踢，好在「白天鵝」期間曾喺英聯盃大勝愛華頓晉級，證明狀態唔係真係下滑，故就算球隊有右閘安祖蘭基坐波監，但喺韋菲特邦尼、尼敦戴亞以及舒維爾等主力都可候命下，主場讓對手半一合理。
客隊紐卡素今季冇踢過一場好波，如果唔係有隊般尼入波數比佢哋少，依家已排緊榜尾；最麻煩係，紐卡素早排俾人感覺有前冇後，但過去星期一作客史篤城輸0:1，好似連攻力都冇埋，再加上陣容上路蘭度艾朗斯、大衛辛頓同施安迪莊都唔打得，出訪威爾斯睇怕都唔會有甜頭。