紅軍讓主形勢明「朗」

紅軍讓主形勢明「朗」
 
三連勝嘅西布朗今晚作客晏菲路，未必可以喺利物浦身上攞分，事關紅軍已經衰到貼地，係時候物極必反，畢竟佢哋都要同球迷有所交代，正所謂人要面樹要皮，「讓主」豁然開「朗」。（周六25，now621台周六10:00pm直播）

自從9月中喺歐聯險勝盧多格德斯之後，利物浦其後4戰未贏過，包括英超負韋斯咸、歐聯負巴素利、馬西塞特郡打吡臨尾俾愛華頓追和，同埋聯賽盃90分鐘解決唔到英冠米杜士堡，搞到射12碼先淘汰對手。重鎊收購嘅巴洛迪利完全做唔到嘢，已經受到唔少名宿同埋球迷批評，不過巴神始終係有料，大爆發證明身價有幾難？

傷兵僅史杜列治一人

史杜列治嘅復出日期一拖再拖，最新消息係今場英超都未踢得，好在史達寧近況唔錯，佐敦軒達臣同埋菲臘比古天奴又已經先後復出，而周中歐聯休息嘅艾拔圖摩蘭奴相信會重返正選，配合埋隊長謝拉特較炮，利物浦的確係可以恃質凌人，今晚喺晏菲路主場要交代，3分點都要攞。

西布朗上屆慘輸1:4

西布朗呢期表現好搶鏡，英超先贏熱刺，聯賽盃又淘汰侯城，上場聯賽更大炒般尼4:0，新星比拉希奴做晒主角，而中場多蘭斯亦可圈可點，不過西布朗喺晏菲路嘅作客成績麻麻，上屆嚟到慘敗1:4，近6次作客利物浦亦輸咗4次咁多。
其實西布朗目前嘅傷兵都唔少，包括新加盟嘅葡萄牙國腳施維斯達華利拿、比利時左閘保高洛尼、北愛爾蘭後衛拜阿迪，同埋一對尼日利亞前鋒伊迪耶同埋安尼捷比，絕對稱唔上係「夫添」，加上新星比拉希奴目標太大，容易被利物浦所防範，西布朗想延續近期嘅連勝走勢有一定難度。