拿玻里「施」法開讓客
係人都知道賓尼迪斯嘅帥位已經岌岌可危，有乜可能賓帥自己唔知？上場拿玻里喺意甲作客少勝薩斯索羅只算係僅僅合格，今場歐霸I組分組賽作客斯洛伐克嘅施洛雲唔可以有任何意外，誓要「施」法開出「讓客」！（周四8，有線64及203台周五1:00am直播）
其實施洛雲喺斯超都冇咩表現，連埋歐霸喺最近5戰輸足4場，最致命嘅就係喺呢5場波入面只入過1球咁大把，除咗有地利之外，實在睇唔到有咩能力威脅對手。當然拿玻里喺季初嘅成績亦冇咩睇頭，仲傳出管理層有意辭退賓尼迪斯，不過話晒佢都係「盃賽專家」，應該識得把握遇到弱旅嘅黃金機會幫自己挽回人氣，預計希古恩、米捷、約拿芬迪根斯文等「賓帥幫」都會全力護駕開埋「讓客」。
打後「黃色潛艇」維拉利爾上場對住近期回勇嘅皇馬都只係少敗，對番低幾班嘅阿波羅利馬素應該可以見番真身，「讓主」唔肯開「-2」就係最佳證明。（周四16，香港時間周五3:05am開賽）
同時間有直播嘅些路迪喺近期手軟腳軟，而薩格勒布戴拿模話晒都係克羅地亞一哥，呢兩隊波相遇好難分到高低，「五五波」吼「細」仲有利。（周四23，有線18台周五3:05am直播） | 
