卡斯洛達主場「愛」攻
凌晨一點場嘅歐霸有好幾支名牌出戰，當中愛華頓將作客俄超球隊卡斯洛達；唔好以為卡斯洛達名氣差而唔睇少佢哋，呢班波有個有料教練領軍之外，喺歐霸外圍賽主場賽事全勝兼零失球，愛華頓未必以強陣應戰下，主隊勢可至少力保不敗，平手盤必捧卡斯洛達。（周四4，有線61及201台周五1:00am直播） 愛華頓上周末力拚利物浦，戰至最後一兵一卒，先至喺補時由菲臘積基爾卡一記超級世界波扳平，過程上消耗體力唔少，須知作客俄羅斯飛行里數唔短，愛華頓一眾主力能否及時復元，肯定係一大疑問，何況「拖肥糖」周日又要出征曼聯，呢場作客俄羅斯，領隊馬天尼斯睇怕都唔會排出強陣。 主隊教頭有料到 估計馬天尼斯僅派出如伊度奧、基斯甸艾素、迪斯甸等正選與副選之間嘅球員上陣，而派拿、路斯巴克利等有傷下，愛華頓呢個B隊陣容其實能力非常有限。
卡斯洛達教頭高盧洛夫前季開始執教，佢一上任就帶領球隊打入歐霸分組賽，咁犀利絕對唔係偶然，因為呢個教頭係原先教摩爾多瓦班霸舒列夫，過去帶領舒列夫打過歐聯之餘，更連奪三屆國內聯賽冠軍，雖然名氣唔算響但絕對有料到，而佢今季帶住卡斯洛達打歐霸，由第二圈開始全勝兼一球不失，呢場肯定以取勝為目標，睇埋愛華頓上輪已解決同組最大對手禾堡，呢場作客贏輸都冇咩所謂，平手盤點都捧主隊啦！ | 
