加拉塔沙雷「仙」聲奪人

加拉塔沙雷「仙」聲奪人
 
唔穩陣！阿仙奴今晚喺歐聯D組主場對加拉塔沙雷，未必可以擊敗呢支嚟自土耳其嘅對手，因為兵工廠大戰前爆發傷兵潮，今屆銳意擴軍嘅加拉塔沙雷有權保住不敗，「讓客」2.58倍抵玩。（周三11，有線64及203台周四2:45am直播）

阿仙奴呢排樣樣嘢都唔順景，聯賽盃俾修咸頓淘汰出局，上場英超就只能夠迫和熱刺1:1，唔可以喺北倫敦打吡取勝壯行色，不過最慘都係阿迪達同埋艾朗藍斯兩人勇戰受傷，據報佢哋復出機會好微，而韋舒亞雖然可趕及傷癒，但領隊雲格都明言佢未好得番晒，好難頂足90分鐘。

阿仙奴前場冇人信得過

除此之外，耶耶辛洛高、迪保治、基奧特同埋禾確特呢批傷兵亦都繼續倦勤，換言之入球重任要交晒俾韋碧克，不過奧斯爾同埋阿歷斯山齊士等進攻球員表現又時好時壞，主勝得1.4倍根本冇支持，想淨勝兩球開個「讓主」更加牙煙。
加拉塔沙雷今屆雖然冇咗杜奧巴，不過「魔獸」年事已高，其實走咗都唔使可惜，最緊要都係保留到史奈達、梅斯利拿同埋尤馬斯呢三線嘅主力，其餘一眾當打嘅土耳其國腳亦全部可列陣，所以呢支土耳其傳統勢力今晚去到倫敦造訪酋長球場未必輸硬，分分鐘仲會有驚喜俾大家。

彭迪夫歐聯經驗夠晒足

其實加拉塔沙雷都好有野心，教練請嚟前意大利國家隊主帥柏蘭迪利，又收購咗拿玻里孖寶迪斯馬利同埋彭迪夫，雖然前者有傷要掛免戰牌，不過彭迪夫呢位馬其頓國腳就身經百戰，過往經常為拿玻里同埋國際米蘭出戰歐洲賽，絕對可以將寶貴嘅經驗帶去加拉塔沙雷，足智彩開讓球主客和，「讓客」有2.58倍分頭相當抵玩。