拜仁讓客正「中」紅心

拜仁讓客正「中」紅心

兩支東歐球隊今晚喺歐聯分途出擊，但平心而論，贏波機會並唔樂觀，特別係E組嘅莫斯科中央陸軍，雖然有主場之利，無奈對手係德甲巨人拜仁慕尼黑，1.81倍「讓客」好難阻。（周二4，有線61、64、201及203台周三12:00am直播）

莫斯科中央陸軍喺俄羅斯國內聯賽同埋盃賽累積3連勝，不過佢哋喺歐聯E組首輪作客慘負羅馬1:5，實力同歐洲列強比較明顯仲有一大段距離，即使兩位射手杜姆比亞同埋阿密特穆沙身懷絕技，都填補唔到中後場嘅不足，主場信唔過。

拜仁慕尼黑繼大勝柏達邦4:0之後，上周又以2:0輕取科隆，暫時喺德甲排第1位，當中頻頻有「士哥」嘅馬里奧葛斯腳風最順，加上有湯馬士梅拿同埋羅拔利雲度夫斯基等高質球員坐鎮，拜仁遠征俄羅斯都未驚過，1.81倍「讓客」穩陣。

畢爾包上盤夠「巴」閉

嚟自白俄羅斯嘅另一支東歐球隊巴迪都唔樂觀，佢哋喺主場迎戰西甲球隊畢爾包，無論從任何角度去分析，都冇乜勝算可言，事關球隊喺國內聯賽累積3場不勝，上一輪歐聯H組賽事更以0:6慘負波圖腳下，所以畢爾包即使近況唔算標青，但係喺恃質凌人嘅情況下，相信可以作客袋晒3分，足智彩開讓球盤，畢爾包讓半球、一球上盤夠「巴」閉。（周二10，香港時間周三2:45am開賽）