捧西布朗上盤「般」錢

捧西布朗上盤「般」錢
 
般尼想打開今季英超勝利之門恐怕又要延期嘞，因為佢哋連主力射手都傷埋，是役造訪西布朗真係唔知點樣打破436分鐘聯賽入球荒，主隊西布朗讓半球、一球夠晒穩陣，上盤非一「般」咁抵玩！（周日40，now621台周日11:00pm直播）

主場嘅西布朗有北愛爾蘭後衛拜阿迪因病缺陣，而兩位尼日利亞前鋒伊迪耶同埋安尼捷比，就要通過最後體測先至知踢唔踢得，不過上述都係小問題，因為西布朗唔係靠佢哋食胡，新星比拉希奴演出好壞先係成敗關鍵，而呢層大家亦可以放心，佢喺周中聯賽盃淘汰侯城一役入完波，今屆英超亦累積攻入兩球，加上有經驗豐富嘅希臘國腳森馬拉斯做支援，前線夠晒火力。

般尼436分鐘入球荒

般尼情況極為不妙，開季後一場波都未贏追，連上一圈聯賽盃都俾英冠錫周三淘汰，單計英超佢哋就係3和1負，問題係自從8月19號英超首輪對車路士一戰入波之後，球隊已經累積436分鐘英超入球荒，攻力明顯係般尼最差嘅一環，睇嚟呢支升班馬未夠班喺頂級聯賽角逐。雪上加霜嘅係球隊上季首席射手丹尼艾格斯受傷，馬菲泰萊同埋禾基斯亦因傷倦勤，中場大衛鍾斯、馬恩尼同埋後衛捷比亞亦有傷在身，唔知過唔過到最後體測，個天似乎都唔係好鍾意般尼，西布朗讓半球、一球買上盤。