拜仁讓主「邦」你贏錢

拜仁讓主「邦」你贏錢  
 
作為一支班霸，失分呢啲嘢真係可一不可再，所以拜仁慕尼黑今晚喺主場迎戰「哎吔一哥」柏達邦，有必要贏得轟轟烈烈，提升信心狀態之餘，同時氹番捧場客一笑，「讓主」要「柏」板。（周二29，有線61及201台周三2:00am直播）

拜仁慕尼黑上場德甲竟然夠膽死同漢堡悶和0:0，話就話對手換咗教練啫，但漢堡最近始終好頹，拜仁和波點都講唔過去。不過滑鐵盧呢啲事件可一不可再，上齊彈藥派出馬里奧葛斯、羅拔利雲度夫斯基、洛賓同埋列貝利之後，今晚喺安聯球場係時候大勝一仗，挽回捧場客嘅歡心。柏達邦目前喺德甲位列第一，簡直係童話故事，但呢個「哎吔一哥」嘅虛火都係時候被撲熄，畢竟佢哋季初嘅對手唔強，包括緬恩斯、漢堡、科隆同埋漢諾威，累積2勝2和成績亦唔算好標青，今晚訪安聯係時候擺低3分，捧拜仁「讓主」。

史浩克可破不來梅

同日有直播嘅德甲仲包括雲達不來梅對史浩克04，呢兩支有名氣嘅球隊今屆仲未打開勝利之門，真係嚇親一班球迷，但由於雲達不來梅星散之後，未有喺適當位置補充番實力，預料短期內都難以反彈，貪心啲可以直接搏好分頭嘅史浩克客Win。（周二32，有線64及203台周三2:00am直播）
史浩克雖然未贏過波，但近仗有愈踢愈好之勢，包括喺歐聯作客1:1賽和車路士，同埋喺德甲同法蘭克福踢成2:2平手，祖普莫亭同埋亨特拉爾兩位射手已分別重拾射門鞋，絕對有力喺作客環境下攻陷雲達不來梅大門，直接取史浩克客Win。