歐冠盃:征德醒神曼城恃質搶Ｗ
玩球网 2021-04-14 10:07:37
| 征德醒神曼城恃質搶Ｗ今晚另一場歐聯8強次回合，多蒙特主場對曼城。英超1哥曼城首回合僅贏2比1，被對手取得作客入球，為求殺入4強作客照攻；「蜜蜂兵團」近況麻麻，主場亦難以招架。曼城近4次歐聯作客德甲球隊獲3勝1和，直取客勝。（Now644、有線661及601台周四凌晨3時直播）首回合曼城雖然只係贏2比1，查實佢哋佔盡優勢，先開紀錄之後有3、4次極具威脅攻門，可惜全部失諸交臂，更被對手拎到重要嘅作客入球。「藍月亮」吸取教訓後，今場會打醒十二分精神，改善埋門質素，領隊哥迪奧拿早前已揚言今場會繼續爭取入波，上場英超不惜輪換7位正選，目的就係留力今場搏殺。曼城近年對德甲球隊戰績極佳，今屆歐聯16強兩回合同以2比0挫敗慕遜加柏，近4次歐聯作客德甲球隊獲3勝1和，今場贏波晉級機會仍然高唱入雲。多蒙特殘陣夏蘭特缺支援多蒙特近5場德甲僅錄2勝，已經跌出前4，隨時無緣下屆歐聯。屋漏偏逢連夜雨，進攻主將查頓辛祖、新星尤素法莫高高齊齊打柴，搞到艾寧夏蘭特孤立無援，呢位挪威箭頭近3場都冇波入。加上多蒙特為求收復首回合失地，今場冇得揀要壓前主攻，防線難免空虛，隨時被曼城有機可乘，客勝穩開。 |